पोदार इंटरनॅशनल स्कूलयेथे विद्यार्थ्यांच्या आरोग्य संवर्धनाच्या दृष्टीने दिनांक १६ व १७ फेब्रुवारी २०२६ रोजी दोन दिवसीय मोफत नेत्र तपासणी शिबिराचे यशस्वी आयोजन करण्यात आले. विद्यार्थ्यांच्या सर्वांगीण विकासाला प्राधान्य देणाऱ्या शाळेच्या या उपक्रमाला विद्यार्थ्यांचा उत्स्फूर्त प्रतिसाद लाभला.
पॅनोरमा व्हिजन जळगावचे संचालक श्री. कल्पेश दोषी यांच्या मार्गदर्शनाखाली प्रमाणित ऑप्टोमेट्रिस्ट टीमने अत्याधुनिक उपकरणांच्या सहाय्याने विद्यार्थ्यांची सखोल नेत्र तपासणी केली. तपासणीदरम्यान काही विद्यार्थ्यांमध्ये दृष्टीदोष आढळून आल्याने त्यांना पुढील उपचार व योग्य चष्म्याबाबत मार्गदर्शन करण्यात आले.
या शिबिराच्या माध्यमातून विद्यार्थ्यांना डोळ्यांचे आरोग्य जपण्यासाठी आवश्यक सवयींबाबत मार्गदर्शन करण्यात आले. पुरेशी झोप, संतुलित आहार, नियमित व्यायाम तसेच मोबाईल, संगणक आणि टीव्ही यांसारख्या डिजिटल साधनांचा मर्यादित वापर करण्याचे महत्त्व अधोरेखित करण्यात आले. डिजिटल युगात वाढत्या स्क्रीन टाइममुळे डोळ्यांवर होणारा ताण लक्षात घेता अशा शिबिरांची आवश्यकता अधिक अधोरेखित होत असल्याचे तज्ज्ञांनी सांगितले.
या उपक्रमाच्या यशस्वी आयोजनासाठी श्री. कल्पेश दोषी यांच्यासह आदित्य धोटे, स्टेफनी फर्नांडिस, राहुल पवार, मुकेश पाटील, सुनील पाटील आणि किरण ताडे यांचे मोलाचे सहकार्य लाभले.
यावेळी शाळेचे प्राचार्य श्री. गोकुळ महाजन यांनी आयोजकांचे आभार मानताना सांगितले की, “विद्यार्थ्यांचे आरोग्य हेच आमचे सर्वोच्च प्राधान्य आहे. अशा आरोग्यविषयक उपक्रमांमुळे विद्यार्थ्यांची शैक्षणिक गुणवत्ता वाढण्यासोबतच त्यांचे शारीरिक स्वास्थ्यही सुदृढ राहते.”
शाळा व्यवस्थापनाने भविष्यातही विद्यार्थ्यांच्या हितासाठी अशा प्रकारचे आरोग्यविषयक उपक्रम सातत्याने राबविण्याचा निर्धार व्यक्त केला आहे.
Social Plugin