मेहरुण येथे राष्ट्रसंत श्री गाडगे बाबा यांची १५० वी जयंती अत्यंत उत्साहात आणि भक्तिभावाच्या वातावरणात साजरी करण्यात आली. या निमित्ताने परिसरात सकाळपासूनच धार्मिक व सामाजिक कार्यक्रमांचे आयोजन करण्यात आले होते. विविध समाजबांधव, भगिनी तसेच युवक-युवती मोठ्या संख्येने उपस्थित राहून कार्यक्रमात सहभागी झाले.
यावेळी रामेश्वर कॉलनी, स्वामी समर्थ केंद्र येथून संत गाडगे बाबा यांच्या प्रतिमेची भव्य मिरवणूक काढण्यात आली. ढोल-ताशांच्या गजरात, जयघोष करत व फुलांच्या वर्षावात मिरवणुकीला सुरुवात झाली. नागरिकांनी ठिकठिकाणी मिरवणुकीचे स्वागत करून संत गाडगे बाबा यांच्या विचारांचा जागर केला. मिरवणुकीची सांगता मेहरुण तलाठी कार्यालय येथे करण्यात आली.
कार्यक्रमादरम्यान संत गाडगे बाबा यांच्या जीवनकार्यावर आधारित मार्गदर्शनपर भाषणे आयोजित करण्यात आली. त्यांच्या स्वच्छता अभियान, समाजप्रबोधन आणि अंधश्रद्धा निर्मूलनाच्या कार्याचा उल्लेख करत उपस्थितांना त्यांच्या विचारांवर चालण्याचे आवाहन करण्यात आले. तसेच परिसर स्वच्छ ठेवण्याचा आणि सामाजिक ऐक्य जपण्याचा संकल्पही करण्यात आला.
संत गाडगे बाबा उत्सव समिती तसेच मेहरुण परिसरातील सर्व समाजबांधव यांनी कार्यक्रमाच्या यशस्वी आयोजनासाठी विशेष परिश्रम घेतले. महिलांची उपस्थितीही लक्षणीय होती. सर्वांच्या सहकार्यामुळे कार्यक्रम अत्यंत शिस्तबद्ध आणि उत्साहपूर्ण वातावरणात संपन्न झाला.
Social Plugin